पहिलो संविधान सभामा प्रधानमन्त्रीका लागि १७ पटकसम्म असफल भएका नेपाली कांग्रेसका बरिष्ठ नेता रामचन्द्र पौडेल तेस्रो राष्ट्रपति बन्ने लगभग निश्चित भएका छन् । तत्कालिन प्रधानमन्त्री माधवकुमार नेपालले प्रधानमन्त्रीबाट राजनीनामा दिएपछि पौडेल १७ पटकसम्म प्रधानमन्त्रीका लागि प्रतिस्पर्धा गरेका थिए । निरन्तरको प्रयास असफल भएपछि तत्कालिन माओवादीका उपाध्यक्ष डाक्टर बाबुराम भट्ट्राई प्रधानमन्त्री बनेका थिए ।
संसद्को ठूलो दल नेपाली कांग्रेसले दुई महिनाअघि आफ्नै नेतृत्वको गठबन्धन जोगाउन नसकेर सत्ता गुमाएपनि राष्ट्रपतिमा भने बहुमत जुटाउने निश्चित भएको हो । संसद्मा प्रतिनिधित्व गर्ने आठ राजनीतिक दलले राष्ट्रपतिको निर्वाचनमा कांग्रेसलाई समर्थन र सहयोग गर्ने सहमति दिएका छन् । सात राजनीतिक दलले उम्मेदवार कसलाई भन्ने जिम्मेवारी कांग्रेसमाथि नै छोडेका छन् ।
कांग्रेसले राष्ट्रपतिको उम्मेदवार कसलाई बनाउने भन्ने औपचारिक निर्णय गरिसकेको छैन । तर, वरिष्ठ नेता रामचन्द्र पौडेललाई राष्ट्रपतिको उम्मेदवार बनाउने करिब निश्चित भइसकेको छ ।
सभापति शेरबहादुर देउवाले राष्ट्रपतिको उम्मेदवार छान्न शनिबार बिहान साढे आठ बजे केन्द्रीय कार्यसम्पादन समितिको बैठक बोलाएका छन् । शनिबार विहान ८ स् ३० बजे पार्टी केन्द्रीय कार्यालय सानेपामा राष्ट्रपतिको उम्मेदवार चयन गर्न केन्द्रीय कार्यसम्पादन समितिको बैठक बस्ने प्रवक्ता प्रकाशशरण महतले जानकारी दिए ।
राष्ट्रपतिमा कांग्रेसबाट सभापति शेरबहादुर देउवा, वरिष्ठ नेता रामचन्द्र पौडेल र पूर्वमहामन्त्री कृष्णप्रसाद सिटौलाको चर्चा छ । नेताहरूले गोपालमान श्रेष्ठ र मानबहादुर श्रेष्ठको नाम पनि लिने गरेका छन् । तर, सभापति देउवाले यसअघि नै वरिष्ठ नेता पौडेललाई राष्ट्रपतिको उम्मेदवार बनाउन वचन दिइसकेका छन् ।
नेताहरूका अनुसार देउवाले प्रधानमन्त्री दाहालसहित शीर्ष नेताहरूसँग समेत पौडेललाई राष्ट्रपति बनाउने समझदारी गरेका छन् । राष्ट्रपति निर्वाचनलक्षित सबै छलफलमा पौडेलको सक्रिय सहभागिता छ । यसबीचमा उनले प्रधानमन्त्री दाहालसहित अन्य दलका नेताहरूसँग समेत छुट्टा–छुट्टै भेट गरेर आफूलाई राष्ट्रपति बनाउने बातावरण बनाउन प्रयास गरेका थिए ।
पौडेलले प्रतिनिधिसभाको बैठकमै राष्ट्रिय सहमतिबाट देशलाई अघि बढाउनुपर्ने बोलेपछि नै प्रधानमन्त्री दाहालले राष्ट्रपतिको निर्वाचनमा राष्ट्रिय सहमति गर्नुपर्ने प्रस्ताव अघि सारेका थिए ।
त्यसो त १४ औँ महाधिवेशनदेखि नै देउवाले पौडेललाई वचन दिएर आएका छन् । महाधिवेशनमा अघोषितरुपमा देउवालाई सहयोग गरेका पौडेलले दुई महिनाअघि मात्रै संसदीय दलको निर्वाचनमा देउवाको प्रस्तावक नै बसेर सहयोग गरे । नेताहरूका अनुसार त्यहीबेला देउवाले आफ्नो समूहका नेताहरूसँग पौडेललाई राष्ट्रपति बनाउने निर्णय गराएका थिए ।
देउवाले पार्टीभित्रै नेताहरूसँग समेत पौडेललाई राष्ट्रपति बनाउन वचन दिइसकेको बताउँदै आएका छन् । सभापति देउवाले आफैँ उम्मेदवार बन्न चाहेको अवस्थामाबाहेक पौडेल नै राष्ट्रपतिको उम्मेदवार भएको एक पदाधिकारीले बताए । ‘सभापतिजी आफैँ उम्मेदवार बन्न चाहनुभएको छैन । उहाँ नै उम्मेदवार बन्न चाहे हो, नभए रामचन्द्र दाइको विकल्प छैन,’ ती पदाधिकारीले भने, ‘अरु पनि शीर्ष नेताहरूकै दाबी त छ, तर अहिले त्यस्तो संभावना छैन ।’
प्रवक्ता महतले शीर्ष नेताहरूबाटै राष्ट्रपतिमा दाबी भएका कारण पार्टीभित्र छलफल गरेर मात्रै औपचारिक निर्णयमा पुग्ने बताए । ‘शीर्ष नेताहरूको दाबी छ, सबै अब्बल हुनुहुन्छ, हामी भोलि बिहान छलफल गरेर टुंगो लगाउँछौँ,’ उनले भने ।
देउवाले पौडेललाई वचन नै दिइसकेको सुन्दा पनि नेता सिटौलाले समेत आश मारिसकेका छैनन् । उनीनिकट नेताहरूका अनुसार सिटौलाले पनि लबिङ गरिरहेका छन् । तर, १३ औँ महाधिवेशनदेखि नै देउवाको सहयोगी बनेका पौडेल पछिल्लो समय चुनावी गठबन्धन र राष्ट्रपति निर्वाचनमा समेत दलहरूबीच सहमतिको बातावरण बनाउनेमध्येमा पर्छन् । १२ बुँदे सम्झौता र शान्ति प्रक्रियामा समेत तत्कालिन सभापति र प्रधानमन्त्री गिरिजाप्रसाद कोइरालाको विश्वासपात्र बनेर माओवादी अध्यक्ष दाहालसँग संवाद गरेका सिटौला त्यसबेलादेखिको सम्बन्धलाई आधार बनाएर दाहालसँग राष्ट्रपतिका लागि वातावरण बनाउन पहल गरिरहेका छन् ।
२५ फागुनमा हुने राष्ट्रपतिको निर्वाचनकालागि शनिबार बिहान १० बजेदेखि ३ बजेसम्म उम्मेदवारको मनोनयन दर्ता गर्ने कार्यक्रम छ ।
प्रतिक्रिया