चर्चित कार्यक्रम इन्द्रेणीका सञ्चालक कृष्णप्रसाद कँडेलविरुद्ध यौन दुर्व्यवहार गरेको आरोपमा मुद्दा दायर गरिएको छ । सोमबार जिल्ला अदालत काठमाडौंमा इन्द्रेणीकी पूर्व गायीका सर्मिला श्रेष्ठले कँडेलविरुद्ध मुद्दा दर्ता गरेकी हुन् ।
गायीका श्रेष्ठले कंँडेलमाथि फेसबुक खातामा अश्लील सन्देश पठाउने गरेको तथा यौन प्रस्ताव राखेको आरोप लगाएकी छिन् । फिरादपत्रमा मुलुकी फौजदारी अपराध संहिता २०७४ को दफा २१९, २२३, २२४ विरुद्धको कसुरमा हदैसम्मको कारबाही तथा क्षतिपूर्ति माग गरिएको छ । व्यक्तिवादी मुद्दा भएकाले फिराद पत्र सीधै जिल्ला अदालतमा मुद्दा दर्ता गरिएको हो ।
इन्द्रेणी कार्यक्रमका महिला कलाकारले एक साता अघि आफूमाथि यौन दुर्व्यवहार गरेको आरोप लगाएकी थिइन् । यसअघि ती लोक गायिकाले प्रहरीमा कँडेलविरुद्ध करणी उद्योगमा जाहेरी दिने समेत कोशिष गरेकी थिइन् । तर प्रहरीले प्रमाण नपुग्ने जवाफ दिएको थियो । यसैगरी, जिल्ला प्रशासन कार्यालयमा ती लोक गायिकाले शान्ति सुरक्षाको माग गर्दै निवेदन दिएकी थिइन् ।
कँडेलले पनि गत शुक्रबार जिल्ला अदालत काठमाडौंमा ती लोक गायिकासहित ६ जनाविरुद्धगाली बेइज्जतीको मुद्दा दर्ता गराएका थिए ।
प्रतिक्रिया