कृषि विकास बैंकबाट अटिजम केयर सेन्टर बलम्बुलाई सहयोग

कृषि विकास बैंक लिमिटेडको सामाजिक उत्तरदायित्व अन्र्तगत अटिजम, बौद्धिक अपाङ्गता केयर सेन्टरलाई आर्थिक सहयोग गरेको छ । चन्द्रागिरी नगरपालिका वडा नम्बर १२, बलम्बुमा सञ्चालनमा रहेको अटिजम केयर सेन्टरलाई सहयोग गरेको हो । कृषि विकास बैंकका निमित प्रमुख कार्यकारी अधिकृत प्रताप सुवेदीले अटिजम भएका बालबालिकाहरुको हेरचाह, आधारभूत शिक्षण तथा सिकाई कार्यको लागि आर्थिक सहयोग हस्तान्तरण गरेको बताउनुभयो ।

कृषि विकास बैंकका निमित प्रमुख कार्यकारी अधिकृत सुवेदीले यो बैंक सामान्य मानिसहरुको समेत कारोवार गर्ने बैंक भएको बताउँदै सेवा लिन आग्रह गर्नुभयो । अटिजम, बौद्धिक अपाङ्गता केयर सेन्टरलाई आर्थिक सहयोग स्वरुप एक लाख रुपैयाँ संस्थालाई हस्तान्तरण गर्नुभएको हो ।

सहयोग हस्तान्तरण कार्यक्रममा कृषि विकास बैंक बजार व्यवस्थापक तथा वरिष्ठ अधिकृत लिला जिसीले राज्यस्तरबाट अटिजम भएका बालबालिकालाई शिक्षा र थेरापी दिनुपर्ने दायित्वको जिम्मेवारी अभिभावकहरुबाट पुरा भएको प्रति प्रशंसा गर्नुभयो ।
अटिस्टिक परिवार तथा शिक्षिकाहरुबाटै अटिजम केयर सेन्टर सञ्चालन गरेको प्रति सबैलाई धन्यवाद दिदैं यसलाई थप प्रभावकारी बनाउनु आफुहरुले समेत सक्दो भूमिका निर्वाह गर्ने प्रतिवद्धता व्यक्त गर्नुभयो ।

कार्यक्रममा समाजसेवी किरण प्रसाद सिग्देलले राज्यको तर्फबाट अझै पनि सबै शिक्षालाई सहयोग गर्न नसकिरहेको अवस्थामा अटिजम जस्तो जटिल र मंहगो शिक्षाको थाल्नी गर्नु निकै चुनौतिपूर्ण रहेको बताउँनुभयो । यस सेन्टरलाई बचाई राख्नको लागि समुदायस्तरबाटै दैनिक मुठी दानको अवधारणालाई समेत अघि बढाई सहयोग जुटाउन सकिने धारणा राख्नुभयो । सिग्देलले सबै तहका सरकारबाट अटिजमका बारेमा नीतिमा समावेश भएपनि व्यवहारमा कार्र्यन्वयन नभएको प्रति चिन्ता व्यक्त गर्नुभयो ।

अटिजम केयर सेन्टर सञ्चालन भएको स्थल बलम्बुमा जानको लागि सहज होस भनेर कृषि विकास बैंकको सहयोगमा पुथ्वी राजमार्ग अन्र्तगत गुर्जुधारा चोकदेखि बलम्बु, पशुसेवा कार्यलय, चन्द्रागिरी वडा नम्बर १२, पुलको मुख र चन्द्रागिरी वडा नम्बर १ देखि अटिजम केयर सेन्टर सञ्चालनस्थलसम्म सडकमा अटिजम केयर सेन्टर जाने बाटो लेखिएका जानकारीमुलक (न्यारेसन बोर्ड) प्लेट राखिएको हो । सो प्लेटको सुरु बैंकका निर्मित प्रमुख कार्यकारी अधिकृत सुवेदीले गर्नुभएको थियो ।

कार्यक्रमा अटिजम केयर सेन्टरकी स्पेशल एजुकेटर रंगिला श्रेष्ठले शुभकामना मन्तव्य व्यक्त गर्नुभयो । सो कार्यक्रम समाजसेवी, साहित्य एवम् कलाकार पवन अधिकारीले अटिजमका बारेमा तयार पारिएको कविता बाचन गर्नुभयो ।
कार्यक्रमका सभापतित्व कृषि विकास बैंक थानकोट शाखाका प्रमुख किरण गौतमको अध्यक्षतामा सम्पन्न भएको हो ।

महिला उत्प्रेरणा विकास मञ्चद्धारा सञ्चालित अटिजम केयर सेन्टर बलम्बुमा अहिले आशिक र नियमित गरि १५ जना बालबालिका सिकाई प्रक्रियामा रहेका छन ।