एमाले अध्यक्ष ओली चौथो पटक प्रधानमन्त्रीमा नियुक्त हुँदै

नेकपा (एमाले) का अध्यक्ष केपी शर्मा ओली आज प्रधानमन्त्री नियुक्त हुँदै हुनुहुन्छ । राष्ट्रपति रामचन्द्र पौडेलले एमाले अध्यक्ष ओलीलाई चौथो पटक प्रधानमन्त्री नियुक्त गर्न लाग्नुभएको हो ।

शुक्रबार नेपाली कांग्रेसका सभापति शेरबहादुर देउवा सहितको समर्थनमा ओलीले राष्ट्रपति कार्यालयमा प्रधानमन्त्रीको दाबी पेश गर्नुभएको थियो । राष्ट्रपति पौडेलले संविधानको धारा ७६ (२) अनुसार सरकार गठनका लागि आह्वान गरेसँगै काग्रेस–एमालेले १६६ जना सांसदको समर्थन सहितको दाबी प्रस्तुत गरेका थिए ।

ओलीलाई आज प्रधानमन्त्री नियुक्त गर्ने र सोमबार बिहान ११ बजे शपथ गराउने तयारी रहेको एमाले प्रचार विभाग प्रमुख राजेन्द्र गौतमले जानकारी दिनुभयो । सपथ लगत्तै सानो आकारको मन्त्रिपरिषद गठन गर्ने तयारी रहेको नेताहरूले बताएका छन् ।