काठमाडौँ, ३१ असार २०८१ । प्रधानमन्त्री केपी शर्मा ओलीको नियुक्ति विरुद्ध सर्वोच्च अदालतमा रिट परेको छ । प्रधानमन्त्रीमा ओलीको नियुक्ति बदर माग गर्दै अधिवक्तात्रय खगेन्द्र चापागाईं, शैलेन्द्र गुप्ता र दीपक अधिकारीले सोमबार सर्वोच्चमा रिट दायर गरेका हुन् ।
संविधानको धारा ७६ (२) को गलत प्रयोग गरी प्रधानमन्त्रीको नियुक्ति गरिएको जिकिर रिटमा छ । ओलीको नियुक्ति बदर गरी संविधानको धारा ७६ (३) को प्रधानमन्त्री नियुक्त गर्न अन्तरिम आदेश सहितको परमादेश माग गरिएको छ। । उक्त रिटको पेशी आगमी साउन ६ गते तोकिएको छ ।
ओलीलाई गत शुक्रबार राष्ट्रपति रामचन्द्र पौडेलले संविधानको धारा ७६ (२) अनुसार प्रधानमन्त्री पदमा नियुक्त गरेका थिए । गत असार २८ गते तत्कालीन प्रधानमन्त्री पुष्पकमल दाहालले संसदमा विश्वासको मत नपाएकाले अब धारा ७६ (३) अनुसार सरकार बन्नु पर्ने जिकिर गरिएको छ ।
उपधारा ३ मा संसदको सबैभन्दा ठूलो दलको नेतालाई राष्ट्रपतिले नियुक्त गर्नुपर्ने उल्लेख रहेको छ।
प्रतिक्रिया