महिला एशिया कपको उद्दघाटन खेलमा आज नेपाल र युएई खेल्दै

एसिसि महिला एशिया कप २०२४ को उद्दघाटन खेलमा आज नेपालले युएईको सामना गर्दैछ । खेल दाम्बुला क्रिकेट स्टेडियममा नेपाली समय अनुसार सवा २ बजे सुरु हुने छ ।

तयारीका लागि नेपाली टोली दुई साता अघि नै श्रीलंका पुगेको थियो । तयारीका लागि नेपालले श्रीलंका विकास टोलीविरुद्ध तीन खेल खेलेको थियो । जसमध्ये पहिलो दुई खेलमा हार बेहोरेको नेपाल पछिल्लो खेलमा विजयी भएको थियो । नेपालको यो तेस्रो पटक एशिया कप सहभागिता रहेको छ ।

यस अघि नेपालले २०१२ र २०१६ मा महिला एशिया कप खेलेको थियो । दुवै पटक नेपालले सबै खेलमा हार बेहोरेको थियो । समूह ए मा रहेको नेपालले पाकिस्तान विरुद्ध जुलाई २१ मा खेल्नेछ भने भारतविरुद्ध जुलाई २३ मा प्रतिस्पर्धा गर्नेछ ।

समूह बी मा बंगलादेश, श्रीलंका, मलेसिया र थाइल्याण्ड रहेका छन् । प्रत्येक समूहका शीर्ष दुई टोली सेमिफाइनलमा पुग्नेछन् ।