एसिसी महिला एसिया कप : दोस्रो खेलमा पाकिस्तानसँग नेपाल ९ विकेटले पराजित

एसिसी महिला एसिया कप क्रिकेट अन्तर्गत समूहको दोस्रो खेलमा नेपाल पराजित भएको छ । श्रीलंकाको दाम्बुल्ला इन्टरनेशनल स्टेडियममा भएको खेलमा पाकिस्तानसँग नेपाल ९ विकेटले पराजित भएको हो ।

नेपालले दिएको १०९ रनको लक्ष्य पाकिस्तानले ११ दशमवल ५ ओभरमा १ विकेट गुमाएर पूरा गरेको छ । पाकिस्तानकी ओपनर गुल फिरोजाले नेपालकी कविता जोशीको बलमा आउट हुनुअघि ३५ बलमा १० चौकाको मद्दतमा ५७ रन जोडेकी थिइन । अर्की ओपनर मुनिबा अलीले नटआउट ४६ रन बनाइन् ।

त्यसअघि पाकिस्तानले टस जितेर फिल्डिङ रोजेपछि पहिले ब्याटिङ गरेको नेपालले २० ओभरमा ६ विकेटको क्षतिमा १०८ रन जोडेको थियो । खराब सुरुवात गरेको नेपालका ओपनर सम्झना खड्का ४ रनमै आउट भएकी थिइन । त्यसपछि कविता कुँवरले १३ रन जोड्दा कप्तान इन्दू बर्मा डकआउट भएकी थिइन ।

अनुभवी रुबिना क्षेत्री पनि ८ रनमा आउट भएपछि नेपालमाथि दबाब थपिएको थियो । ओपनिङ ब्याटर सीता रानामगर २६ रनमा बनाएर आउट भइन् । त्यसपछि छैटौं विकेटका लागि कविता जोशी र पूजा महतोले ३४ रनको साझेदारी गरेपछि नेपाललाई राहत भएको थियो ।

नेपालले सेमिफाइनलमा पुग्न मंगलबार भारतलाई पराजित गर्नु पर्नेछ । भारतसँग हार बेहोरेको अवस्थामा अन्तिम खेलमा पाकिस्तानलाई युएईले हराए पनि नेपालको झिनो सम्भावना हुनेछ ।